Fatxadan erdialdean, eraikinaren hiru pisuak elkarlotzen dituen portada ikaragarri bat ikusiko dugu, hiru bao ordenekin.; sarrerako atea beheko solairuan, balkoiak lehen eta bigarren solairuetan eta alboetan leihoak.
Gorputz nagusia bertikalean altxatzen da, kale bakarreko erretaula baten erara egituratuta:
Behe solairuan, sarrerak erdi puntuko arku bat eta irudi geometrikoekin apainduriko dobela handiak ditu. Sarrerako albo bakoitzean bi zutabe joniar daude, aurrealdean kartelaz apaindurik dagoen plinto gainean.
Solairu nagusiak antzerako egitamua du: erdian ateburudun baoa, alboetan zutabe pare bat, aurrekoak bezala, aurrealdean kartela klasikoz apainduriko euskarri gainean. Zutabeek, kate-mailaz apainduriko frisoa eusten dute eta guztiaren gainean erdibitutako frontoia. Apaintzeko, bi bola pare, piramide gainetan (XVI. mendearen azken herenean oso ohikoak ziren elementu hauek).
Hirugarren pisuko baoa txikiagoa da. Ateburua du eta pilastra konposatuak. On Jesus Gil Massa arte-historialariak jauregi honen inguruan egindako azken azterketen arabera, lana, Pedro Ibarra maisuarena da.